Apa saja Pantun palang pintu?

Pantun palang pintu adat Betawi

Rumah gedongan rumah belande, pagarnya kawat tiangnya besi,

gue kaga mao tau nih rombongan datengnye dari mane mau kemane, tapi lewat kampung gue kudu permisi.

Makan sekuteng di Pasar Jum,at, mampir dulu di Kramat Jati,

aye dateng ama rombongan dengan segala hormat, mohon diterime dengan senang hati.

Kalo makan buah kenari, jangan ditelen biji-bijinye,

kalo ku udeh niat dateng kemari, gue pengen tahu ape hajatnye?

Ade siang ade malam, ade bulan ade matahari,

kalo bukan lantaran perawan yang di dalam, kaga bakalan nih laki gue anterin ke mari.

Kage salah Abang beli lemari, tapi sayang kage ade kuncinye,

kage salah abang datang kemari, tapi sayang tuh perawan ude ade yang punye.

Crukcuk kuburan cine, kuburan Islam aye nyang ngajiin,

biar kate tuh perawan udeh ade yang punye, tetep aje nih laki bakal jadiin.

Kalo jalan lewat kemayoran, ati-ati jalannye licin,

daripada niat lu kage kesampaian, lu pilih mati ape lu batalin.

Ibarat baju udah kepalang basah, masak nasi udah jadi bubur,

biar kate aye mati berkalang tanah, setapak kage nantinye aye bakal mundur.

Ikan belut mati di tusuk, dalam kuali kudu masaknye,

eh nih palang pintu kage ijinin lu masuk, sebelum lu penuin persaratannye.

Kude lumping dari tangerang, kedipin mate cari menantu,

pasang kuping lu terang-terang, adepin dulu jago gue satu-persatu.

Bintang seawan-awan, aye itungin beribu satu,

berape banyak Abang punya jagoan, aye bakal adepin satu-persatu.